சென்னையில் ஆட்டோமொபைல் வரைகலை நிறுவனம் ஒன்றில் பணிபுரிந்து வருகிறார் நாயகன் மனோகர் என்கிற மனோ. அங்கு அவரிடம் பயிற்சிக்காக இணையும் நிவேதாவுடன் மனோவுக்கு ஒரு அழகான நட்பு ஏற்படுகிறது. கதை தற்போதைய காலகட்டத்தில் இருந்து, மனோகரின் துள்ளலான கடந்த காலக் கல்லூரி வாழ்க்கைக்கு (Flashback) நகர்கிறது.
கல்லூரி நாட்களில் மனோகர் செய்த சில வரம்பு மீறிய குறும்புத்தனங்களாலும் அத்துமீறல்களாலும், அவனது இறுதியாண்டில் கல்லூரியை விட்டே அதிரடியாக நீக்கப்படுகிறான். கடைசி வருடத்தில் நீக்கப்பட்டதால், அவனது படிப்பைத் தொடர வேறு எந்தக் கல்லூரியிலும் இடம் கிடைக்காமல் அலைந்து திரியும் நிலை ஏற்படுகிறது.
இதற்கிடையில், ஒரு மகளிர் கல்லூரி அரசாங்கத்தின் புதிய விதிமுறைகளின்படி இருபாலர் பயிலும் (Co-education) கல்லூரியாக மாற்றப்படுகிறது. வேறு எங்கும் இடம் கிடைக்காத சூழலில், பல எதிர்பாராத திருப்பங்களுக்குப் பிறகு, அந்த மகளிர் கல்லூரியின் வரலாற்றிலேயே ‘முதல் மற்றும் ஒரே ஒரு ஆண் மாணவனாக’ மனோகர் போய் இணைகிறார்.
சுமார் இரண்டாயிரம் மாணவிகளுக்கு இடையே ஒரே ஒரு ஆண் மாணவனாக மனோகர் எதிர்கொள்ளும் தர்மசங்கடமான தருணங்களும், இளமைத் துள்ளலான நகைச்சுவைச் சம்பவங்களும் படத்தின் முதல் பாதியைத் தொய்வில்லாமல் கொண்டு செல்கின்றன. அந்த வளாகத்தில்தான், பவளக்கொடி என்ற மாணவியின் அறிமுகம் கிடைத்து, அவளது காதலில் விழுகிறான் மனோகர்.
ஆனால், அந்த இளமைப் பருவத்துக் காதலில் ஏற்படும் அவநம்பிக்கை மற்றும் சில தவறான புரிதல்களால் அந்தக் காதல் பிரிகிறது. அதன் பிறகு, தற்போதைய வாழ்க்கையில் நிவேதாவுடன் ஏற்படும் நட்பு அடுத்த கட்டத்திற்குச் சென்றதா? என்பதே ‘ஹைக்கூ’ படத்தின் மீதிக்கதை.
மொத்தத்தில் ‘ஹைக்கூ’ – இளமைத் துள்ளல்
மதிப்பீடு : 3.25 / 5
நடிகர்கள்:ஏகன், ஸ்ரீதேவி அபல்லா, ஃபெமினா ஜார்ஜ், அதிர்ச்சி அருண், சுப்பிரமணிய சேது, அதியமான், மைம் கோபி
இசை : சித்து குமார்
இயக்கம் : யுவராஜ் சின்னசாமி
தணிக்கை சான்றிதழ் : U/A
மக்கள் தொடர்பு : சுரேஷ் சந்திரா & அப்துல் நாசர்
About the Author
